2009-01-12

信報財經新聞 曹仁超2009-01-12 投資者週記 财富消失效应存时差

  1月11日，周日。1月系分享预测及展望嘅月份。回顾2008年1月大部分分析员嘅预测及展望，事后证明皆失准。咁点解2009年1月佢地嘅预测及展望仲有参考价值？去年1月，有边个预测到雷曼事件？去年1月，有边个话你知2008年会发生金融海啸？再次证明人系冇预测能力。


美零售业进入长期下跌

　　有智慧不如追随趋势，2009年大趋势系熊市二期延续，阻力喺16000点，支持喺10600点，相信2009年大部分日子恒指将喺呢个框框内上落，直到趋势改变为止。点样响上落市中搵食？上周六我老曹喺E*Trade研讨会上有教，如各位冇参加，可睇睇2月份将出版嘅《信报月刊》；我老曹相信，2009年投资策略以拣股为主（Stock-Picking），唔似2008年大趋势系向下，因此最好做「Short」（沽空），因我老曹唔做抛空，只有持盈保泰。此外，投资者应利用上周反弹减持铜、镍及其它金属股，因金属价格只出现跌后反弹，一旦反弹完成后又再跌。

　　美国12月份零售业出现连续第六个月回落，系1992年以来最长一次回落期。面对失业率上升，加上股楼下跌令财富消失，美国零售业正进入长期回落。

　　英国楼价跌至2006年10月以来最低价。英国楼价2007年10月见顶后，有些地区楼价跌幅已达19.9%，而有些跌幅只有9.7%；十大地区中则无一不跌。

　　2009年面对股市「Go-Nowhere」，策略上系低买（例如恒指喺万一点）、高卖（例如上周接近万六点）。2009年仍有唔少机会可Double your money（例如去年11月至今年年初），相信未来仲有三次或以上。

　　2009年经济在恶化，但并非跌落深渊。股市去年面对去杠杆化及经济衰退，2008年10月27日港股因超卖引发反弹，并喺2009年1月8日初结束。2009年系睇淡太迟、睇好太早，各位睇淡应喺2007年11月，最迟系2008年5月；睇好应系2010年之事（淡市不出三年）。因此，如非投资高手，2009年最好无所事事，例如吃喝玩乐。坦白讲，2009年股市不宜散户。


2009寻找傻瓜年

　　上周道指跌4.82%，收8599.18。上周一我老曹已提点大家利用1月反弹市减持，因企业纯利展望在减少。上周跌幅最大系金融类，达8.18%。道指由去年11月21日反弹似乎已完成。

　　恭喜大家，虽然2008年损失不菲，但总算度过，因为活着就是精彩。

　　1月20日奥巴马将上台，成为美国第四十四任总统，担心届时亦系美国人噩梦嘅开始，因为奥巴马面对嘅系一个就快破产嘅美国。由1900年至今，响新总统就职年，1月及2月股市皆有较佳表现，到3月才回落。但2009年1月，股市只升咗几个交易天。2009年投资市场相信系「寻找傻瓜年」，边个愿意做傻瓜便不妨高价抢货。

　　上周四美国波士顿联储银行主席罗森伦格响麻省按揭银行家协会年会上话，呢次衰退较大部分人想象中严重，同时更长！唯一利好因素系能源价格已回落，最终可令经济止跌回升（佢2010年唔再连任联储局政策决策成员，其言也善乎）。


股市预测信唔过

　　著名投资家John Bogle（Vanguard集团创办人）向散户提出忠告：

　　一、不要信任何股市预测。嗰D所谓专家（华尔街十二大证券行）去年平均预测标普2008年年底见1640点，结果系2008年年底标普见903点。可以话全部睇错市。
　　二、忘记资产分配（分散投资）。将资金集中及逃避风险而非分散风险。2008年系避险年而非分散风险年。
　　三、不要追求高回报，赚得愈多，风险愈大。2007年表现出色嘅基金，2008年皆亏损50％以上。响熊市之中，保本为上策。
　　四、自己唔识嘅嘢少沾手。唔少金融产品嘅出现，目的只系赚取佣金及费用，而非为投资者增加利润。

　　1977年美国政府通过Community Reinvestment Act，鼓励FDIC向商业银行及存款公司提供保险，以便佢地向社会上低中收入人士提供贷款。从此美国楼价进入反复上升期，直到2006年Countrywide Financial出事（美国每五宗楼按，就有一宗由该公司负责），令美国银行（Bank of America）注入20亿美元资金及提供115亿美元信贷，美国联储局亦提供500亿美元垫支。虽然系咁，2007年Countrywide仍支持唔住，股价由44.07美元跌至低于2美元。次按危机喺2007年逐步浮现，到去年9月雷曼兄弟事件引发全球金融海啸。响各国央行大量注资下，道指喺去年11月21日见7449点后企稳及反弹。事情系咪就咁过去？

　　柏克莱银行头头John Varley认为，2009年及2010年美国楼价仍可回落15%。Cass Business School教授Andrew Clare认为，到2010年美国楼价将较2006年高峰回落40%。我老曹相信，恒生指数由2008年10月27日至2009年1月7日嘅上升，只系熊市二期内一次大反弹。


联储局以好债交换坏债

　　12月份美国又有五十二万四千人失业；失业率已升至十六年新高，达7.2％，为1993年以来最高，估计2009年最高可见9％（2008年失业人数已达二百六十万）。美国财赤已接近GDP 7％，如进一步上升，将危及美元嘅安全（例如财赤占GDP 8％）。2009年将系苦难年（痛定思痛），唔知痛苦指数可上升到边个水平。

　　美国债券泡沫爆破会否系「另一只鞋」？债券价格下跌令按揭贷款唔再产生收益，其它贷款则面对赖账，令金钱价值迅速消失，而产生compressive debt deflation（中文好难译，大意系指因贷出嘅款项变成呆坏账而产生通缩压力）。

　　联储局为阻止上述情况出现，正以好债（国债）交换坏债（例如两房债券）及向银行注资，并要求佢地将资金贷出去。最终系市场力量战胜政府干预，或系有形之手打赢无形之手？最后结果系：一、美国政府摧毁美元价值（例如战后国民党曾摧毁关金券及金圆券嘅价值，阿根廷政府及唔少南美洲及非洲政府亦曾摧毁本国货币嘅价值）；二、债券市场泡沫爆破。眼前形势似乎系后者而非前者。次按危机后，美国政府并冇大量增加美钞供应量，而只系大量增加美债，理由系美债吃香，市场出现flight for quality现象；即投资者抛售房屋、股票、黄金、商品等产品，将资金用作吸纳政府债券。不过，当美债供应大于需求，债券泡沫系咪已响去年12月已爆破，而令美债势将大跌？


银行业仲有排搞

　　2008年信贷收缩压力只落喺金融市场上；2009年因企业破产、裁员渐渐影响实质经济。美国12月份工厂订单为1992年以来最大跌幅，信贷收缩令二手楼交投大减，服务业、零售业、饮食业衰退压力亦在上升。例如美国三大汽车厂由二十四万间供货商供应各种零件，即系话汽车不景气除影响三大汽车厂嘅九十七万工人外，亦涉及全球三百万工人嘅就业问题。

　　2009年经济大方向系收缩，因廉价能源、廉价原材料及廉价劳动力推动全球经济向上嘅时代结束，由1982年开始全球GDP高增长时期亦告一段落。因收缩所产生嘅财富消失压力，会否令全球生活水平下降，以及令更多人失去家园、收入甚至捱饿？只有耐心观察。

　　所谓财富消失效应，系有两年时差。美国楼价从2006年年中开始下跌，而美国消费减弱由2008年年中才开始【图】；2009年1月美国楼价仍在回落，代表2009年全年甚至之后美国消费力仍唔会上升。分析界估计2009年下半年美国经济会复苏，只有傻瓜先至信！美国商场2008年第四季空置率高达7.1％（第三季6.6％），估计2009年第一季进一步上升。银行业分析员Meredith Whitney相信，2009年全球银行仍需大量注资，即银行业仲有排搞。

春寒料峭更胜冬

　　2001年世界经济开始下调，但格蛇同殊仔连手阻止其下调，利用减税、减息及美元汇价下跌，去造就2003到2007年繁荣期。2008年世界经济又再下调，贝南奇虽尽九牛二虎之力去阻止，2009年再加埋奥巴马，能否扭转乾坤？例如利用公众开支去抵销私人消费下降，能否成功？恐怕美国呢架老爷车将步九十年代日本嘅后尘，再无法高速行驶矣。全球廉价资源及廉价劳动力时代，已因中国完成三十年改革开放而结束，美国已太老了，无力再打呢场仗。

　　2008年内地楼市从火热到冷清、从希望到失落。2009年又如何？专家认为将更理性、更健康。2008年楼市流行语——抄底，结果系抄咗好多次，仍然伊于胡底。冬天来了，春天还会远吗？面对2008年下半年内地楼市开始嘅「寒流」，唔少企业已捱唔住，春寒往往较冬天仲冻，何况楼价走喺经济之后而非之前。近60％内地市民相信，2009年楼价仍将下跌，因为2009年上半年内地经济仍好唔起来。利率回落虽然有助置业，但先决条件仲系市民收入能否上升？中国经济正由出口导向转为内需带动，通常需时三年才完成转型。由2008年起计要到2010年年底才完成三年过渡期，相信最快到2011年经济才逐步上升（股市走喺经济之前三到九个月，即2010年年中起步走。房地产走喺经济之后三到九个月，即到2011年才进入「大地回春」期。


改革开放「后繁荣期」将现

　　天下久分必合、久合必分。战后美国同苏联喺政治、军事上曾二分天下，最后美国胜出，响政治、军事上出现一国独大局面。但喺经济上自1971年美元危机后，世界步入「三头马车」时代（即美国、日本同西德）。今天全球经济仍系三分天下（即美国、亚太区同欧盟）。过去经济上最强大嘅美国正进入衰退期，至于欧盟相信只能独善其身，依家正在冒起嘅系亚太区（日本除外）。美国经济大萧条由1929年开始，到1946年才完全走出来，前后十七年。呢次由2007年11月开始嘅美国次按危机，需时几耐才可走出来（日本1990年嘅衰退到2003年4月才见底，共十四年）？

　　至于欧盟因实施三十多年福利政策，对欧洲企业嚟讲，早已成为沉重负担，福利开支正在拖垮欧盟内嘅大企业，虽然唔似美国企业面对大量破产及重组，但大方向仍系好也好不了、坏也坏不了。反观中国透过三十年改革开放政策，正在脱胎换骨，不但经济上完成同国际接轨，并吸收欧美制度之长，而避免走上西方国家福利社会之路。

　　中国唔似欧盟由多国组成令力量分散，中国喺政权上系完全统一嘅大国，估计到2030年中国嘅实力可渐渐接近美国（但人均收入相信仍唔及美国人）。未来三十年，我地将睇见改革开放嘅「后繁荣期」出现。

　　PIMCO亚洲区董事Brian Baker认为，亚洲区经济复苏仍有排等，即2009年无法好起来。


经常面对「三个我」

　　我老曹为TVB拍摄特辑，共享咗三天时间才拍成《我的2008》，喺上周一晚上10时35分出街。上周二走在街上，唔少人同我老曹打招呼，话系我老曹Fan屎！真系有D做明星嘅感觉。

　　做我地呢行，经常面对「三个我」。第一个「我」叫做形象。过去因每天写日记、经常开研讨会又或者上电视产生嘅那个「我」，其实只系我老曹嘅形象，唔系真我。另一个「我」系太太眼中嘅我——既为食又唔肯做运动，食生果要老婆切好至肯食。当然还有另一个「自我」藏喺内心深处，例如少年丧父之痛及对自己嘅期望，许多时因无法做到自己嘅期望而产生挫折感，往往响人人兴高采烈时自己忽然沉默，因内心深处仍有一份莫名其妙嘅空虚感。

　　人系十分奇怪嘅动物。因我老曹从未做过舞台剧，对舞台剧有份好奇。2007年9月同詹瑞文兄做过《富爸爸，笑爸爸》后，认为做舞台剧付出与收获不成比例（例如编写嗰份剧本，单系度桥已用咗六星期，练习又用咗两星期，最后三天更天天喺舞台上走来走去，合共用去八星期，而演出时间只有两小时，能博取嘅只系台下一千几百人嘅欢笑！）。呢次拍电视台半小时特辑，由同TVB剧本组见面商讨内容开始到拍摄，共用去三天，每天八小时都几辛苦，但收获唔错。不过，我老曹觉得最好玩都系做投资——嗰份紧张、刺激、得失感，冇一个行业能及。